extrait de la présentation :

Ghjuvan Luigi Moracchini, cù issu primu rumanzu, poni un passu novu in issa elaburazioni di a literatura corsa. U so naturalismu era in sumenti in i so nuvelli. Dopu avè purtatu sin’à una cima a prova chì si pudia sfruttà guasgi à l’infinita una figura tradiziunali (è puri ricustruita) com’è u mazzeru (si vighi a so racolta www.mazzeri.com), l’autori si stacca da a so timatica prifirita è fundatrici par piddà l’avviu di issa mossa ammintata più in sù, ma in un versu universu propiu soiu è propiu nosciu à tempu. Nasci cusì un’ andatura mischja chì intreccia u sguardu suciali è un’ erudizioni literaria è esoterica chì si metti à u serviziu di u studiu di mendi. L’effettu hè bunissimu chì ci caccia da i miti di l’esaltazioni naziunali è ci lampa in una real literatura accunciata di misticismu (i sciffri segni par asempiu) è di literatura di grandi sparghjera chì duventa dinò fundatrici è rifarenti quant’è un mitu (In the heart of darkness di J. Conrad o opari sinematografichi giappunesi, in altru asempiu). Nutemu chì tandu, l’opari sò ammintati in lingua d’origini, segnu di una situazioni mundiali di l’isula.

Ci arreca tandu un’opara fora d’ogni cursitù cunvinuta ma in corsu è in Corsica, ùn ci hè dubbitu. L’investigazioni ùn và micca à circà i sviati suciali, pulitichi o i canaletti umani, ferma in u cuttidianu, in a « nurmalità ». A nuvità maiò hè dinò quì. U sguardu si faci crudu ma senza scopu fora di u ghjocu literariu. Truvemu una scrittura discrittura di mendi, ritratti, facci è prufili, prisenzi senza avvena, assenzi senza dolu, bioti asistinziali, via una galaria di chjocchi chì dici una generazioni sazia di tuttu. È inde Moracchini u cinismu è a causticità di a forma incalcani u fondu.[...]

Alanu Di Meglio

Quatrième de couverture

... Mi ritrovu accantu à Marcu è a so nova cumpagna. Sentu u so profumu capitosu, vecu a so manu in quilla di Marcu è l'abandonu di a so parsona. Mi veni allora un sentimentu stranu, com'è una stilettata in cori, una idea ch'e ùn cridiu di cunnoscia. In fondu à mè, si torci u stilettu chì allarga una piaca dulurosa : mi sentu Ghjelosu !

Si dici chì a ghjelusia ùn si spanna chè ind'è a ghjenti chì ùn hè micca stata à bastanza amata in la so zitellina è mi rendu contu, à a forza di issu sentimentu chì mi strappa u cori, chì a mio ferita devi essa prufonda, anziana è piatta.

Quand'e vecu à Marcu Taffarelli, a trentina, vistutu da panni chjari, pantaloni Armani, maglia Boss, spichjetti di soli in li capelli à deci ori di sera, l'ochji turchini ingirati di rivigliuli di risa, mi pari di veda mi. Semu pari, semu simili, semu fatti in la listessa forma. Purtemu i custumi chì ci facinu simili à millai d'altri ghjenti.

Quand'e paraguneghju Anna cù a so brunetta, ùn ci hè micca dubitu, hè Anna chì vinci a partita. Ùn ci hè discussioni pussibuli : hè Anna u gioellu di a serata ! Allora, parchì essa ghjelosu? Parchì Marcu Taffarelli hè più riccu? Parchì hè l'amicu di tutti? Parchì

voir la page "Auteur"

de Jean-Louis Moracchini