Tuttognunu ti hà in casa issa cusarella di nunda ch'omu chjama un'infiltrazione. Un'incritta fine fine nantu à un muru o nantu à u celu. Quasi quasi ùn si vede. I nostri ghjorni sgranfignati una cria. Da tuppà subitu cu ghjessu è cazzola. Ma ùn ci si face casu : dumane farà ghjornu. Intantu l'affare si sparghje è si scava ma nunda spunta à l'infora. A cosa travaglia à l'indrentu, travaglia. Ùn ci si pensa micca senza piantà ma si sente sempre, da issa banda custì ch'ellu ci hè un risicu. O un altrò.

Saranu trenta anni ch'ella mi stuzzica, ma mai mi sò propriu resu contu ch'ella devia esse un pocu cusì, quella beata "scrittura in puesia". Scrivendu à casu è à disgrazia ùn mi hè mai parsu utile nè assinnatu di accoglie issò ch'o avia scrittu è dì mi chì isse pagine allibrate una nantu à l'altra possinu esse puesia.

Dunque possu solu rimarcà ch'o l'aghju sempre praticata cusì, in modu permanente ma à stonde. Cù un tira è molla mai stanciatu trà duie manere chì cumandanu...

(GHjacumu Thiers, strattu dà Un infiltrazione, testu à principiu)

L'ARRETTA BIANCA

A stonda

l'arretta bianca

tutta sole tutta fretu

in i mo ghjorni

cusgita

hè spechju

duv'elli voltanu tutti i stalvati

spulati per sopra à u capu

u tempu hè frombula

pè isse tolle di nustalgia.

S'o fussi in tè, o Ulisse,

mi ne stava arrimbatu

à a fica o à l'alivu,

a pelle bianca,

u tintinume di l'anelli,

o Nausicaa.