Illustrazione di Filippu Antonetti

L'auteur : Gian Carlo Tusceri

A frusta avia buinatu à li sumbrettu annant'à u ponti, friscendi avvincin'à l'arichja di Dorghut, chì pinsendi à u munasteru, undi gh'erini custiditi chissà quali tesori, avia persu u ritmu di a rimata de' cumpagni di galeria.

U furzatu g'avia datu una curriulata d'ochji cumi una curtiddata, solu pè un mumentu, è l'aguzzinu ginuvesu, vivendi quiddi saetti vilinosi di bestia arraiulita, pè istintu s'era allutanatu. A risaca, suttu costa, si gunfiaia di sciuma unde calanchi.

I gabbiani vulaini bassi cù i so richjami arruchiti, calendi in pichjata annant'à u muntonu di l'acughji apprittati da vicinu da i riccioli in amori. Tutt'intundu, ancora sì Dorghut miraia cun tutta l'attinzioni di l'esperienza soa, nun si vidia un solu filu di fumu.

Eppuri era chjaru chì quiddi isuli, chì avà gh'erini da davanti, duviini essi abitati... Eppò gh'era quidda storia di u munasteru di Hassan...

Sì Hassan Aga nun g'avia fattu a coglionella, u tisoru de monachi duvia essi à mancu un migliu, in una di quiddi isuli, è u mari era carmu...

Accidenti puri à quisti cateni ginuvesi, si dicia u cursaru. Ma intantu prima o poi, sì nun crepu in quista galera, ni piddaraghju capu.